Á smáræðismörkum

Ull er hlý, umvefjandi og loftar vel. Á Skyggnissteini getur orðið mjög kalt og ekki alltaf snjór til að hlífa gróðrinum. Við ákváðum að prófa að nota úrkastsullarreyfi til að verja plönturnar. Undir ullinni eru kryddjurtir, oregano, tímían o.fl. Það verður forvitnilegt að vita hvernig kryddið kemur undan reyfinu. Enn höfum við ekki fengið epli. Hvaða áhrif ætli það hafi að setja ull yfir ræturnar? Viðkvæmu rósirnar fengu lika ull en ekki heilt reyfi. Það er forvitnilegt að sjá hvernig hvítlauknum vegnar hér undir. Á vinstri myndinni er ull yfir lauknum en hey og síðan gróðurplast yfir lauknum á hægri myndinni. Í bókinni Självhushållning på Djupadal eftir Marie & Gustav Mandelmann sáum við að þau höfðu sett ullarreyfi í göngustíga á milli beða.

Stór hluti af hvítlauksuppskerunni 2018 Þessir laukar voru settir niður um mánaðamótin sept/okt 2017: Nokkrir stórir og fínir lífrænir ítalskir laukar keyptir í Frú Laugu, aðeins stórir og fínir geirar notaðir. Trúlega um 80 geirar. Topadrome.  Þrír franskir laukar, ekki stórir. 18 frekar stórir og fallegir geirar. Therador.  Tveir franskir laukar. 24 misstórir geirar sem litu ágætlega út. Unikat. Tveir grískir laukar. 24 frekar litlir geirar, misfallegir, margir ágætir. Germidour 2 franskir laukar. 9 stórir geirar. Messidor  Einn franskur laukur, fimm stórir geirar. Thermidrome  Tveir franskir laukar, 17 misstórir, margir mjög stórir geirar sem þola mikið frost. Laukurinn hefur verið tekinn upp í nokkrum áföngum og enn er eitthvað eftir í görðunum. Margir laukarnir eru frekar litlir. Kannski er það tíðarfarið. Frost lengi í jörðu. Örfáir sólardagar fram í ágúst en nóg af rigningu. Ítalski laukurinn frá Frú Laugu kom einna best út. ...

Hvítlauksuppskeran í fyrrasumar var mikil og góð. Um mánaðamótin sept./okt. settum við fjölda hvítlauka af mörgum tegundum niður í mismunandi beð, gróðurkassa, með eplatrjánum og í hraukinn (hugelkúltúrinn). Það eru mjög margar plöntur sem talið er að vilji vaxa með hvítlauk. Við vorum full bjartsýni  og hlökkuðum til uppskeru næsta árs.  Nú erum við  ekki eins bjartsýn. Fyrst snjóaði mjög mikið, svo kom þíða, en ekki nóg til að frost færi úr jörðu. Þá myndaðist klakabrynja og aftur snjóaði yfir hana. Við þessar aðstæður  er hætta á að laukurinn fúni undir klakanum. Til öryggis ákváðum við í lok febrúar að setja niður nokkra hvítlauka. Svona ef allt fer á versta veg. Okkur finnst borga sig að kaupa hvítlauk þó enn sé mikið til af eigin ræktun. Laukarnir okkar ná sjaldan fullri stærð og betra að setja niður vel stóra geira.  Við höfum áður sett hvítlauk niður að vori. Þá í stóra blómapotta. Það hefur gengið vel en laukurinn verið frekar ...