Að sá í 13 stiga frosti

dagny

Það er svo margt sem mig langar að gera 

Hvernig get ég ræktað mikið af grænmeti og haft samt tíma í annað?

 Getur vetrarsáning hjálpað?

Þetta er áskorun


Safn af ílátum til að sá í. Plastgeymslukassar eru góðir. Það þarf að bora í þá loftunargöt. Líka í botninn ef það er hætta á að það rigni á kassana. Það er líka hægt að nota allskonar brúsa. Held að reynslan og hugmyndaflugið muni fjölga möguleikum.

Ég skar ofan af brúsunum. Byrjaði á að setja vikur, síðan áburðarríka mold, þar ofan á sáðmold.


Í þessari lotu 17. janúar 2024 sáði ég fyrir rósakáli, brokkelí, vetrarhvítkáli, rauðkáli, rófum, hnúðakáli, kamillu, hjólkrónu, morgunfrú, skjaldfléttu, spínati, vetrardilli og toppkáli. Blómin eru öll æt eða góð í te.  Á listanum mínum eru margar fleiri tegundir sem mig langar að prófa að sá fyrir og hafa í frostinu.
         
Hér er búið að skera brúsann, setja vikur, mold, sáðmold, fræ og snjó. Ég reyndi að hafa moldina aðeins raka áður en ég sáði. Setti síðan smá snjó ofan á moldina, það var að vísu bara hægt að fá harðan snjóklaka. Vonandi verður rakinn samt jafn þegar hlýnar og klakinn bráðnar. Nú á bara eftir að líma brúsann saman og merkja hann. Fara síðan með öll ílátin í Litla Boga. sem er óupphitað gróðurhús. Það er líka hægt að hafa þetta úti í skjóli.                              
          
Fyrstu mistökin voru þegar ég í hugsunarleysi tók rósakálsbrúsann upp ofarlega og mundi ekki eftir að þetta límband heldur litlu. Það var svo mikið frost að moldin var strax frosin og lítið fór úr brúsanum þegar hann datt á jörðina. Til öryggis ætla ég að sá aftur fyrir rósakáli.
Allt komið í Litla Boga. Ég freistaðist til að setja nokkra blómapotta í plastpoka, passaði að það væri góð loftun. Ég er nú ekki mjög bjartsýn á þessa tilraun.
Ég er að reyna að minnka vinnuna á vorin. Fræin fara að spíra þegar það fer að hlýna, plönturnar ættu að vera hraustar og harðgerðar við þessar aðstæður. Það er vinna að herða plöntur sem ræktaðar eru í hlýju og þurfa svo að fara út í næðinginn.
Mesti vinnusparnaðurinn væri ef ég gæti sáð beint í litla potta og ekki þyrfti að prikla. Það er nægt pláss í gróðurhúsunum en vandinn er mýsnar. Þær eru rosalega svangar þessa dagana. Ég þyrfti að vera með allt í lokuðum ílátum. Ég veit ekki hvort þetta fær frið en ég er næstum viss um að það er algjör tímasóun að sá í potta sem ekki eru músheldir.

Nú sjáum við til hvað gerist. Koma upp plöntur? Verður þetta vinnusparnaður?




Ég veit að sumir sá beint út í gróðurkassa. Mig langar að prófa það. Hvað gera mýsnar þá?
Það er hópur á f.book sem heitir Vetrarsáning. 
Ég heyrði fyrst um vetrarsáningu þegar ég keypti bók eftir hina sænsku Sarah Bäckman
Hún er með allskonar fræðslu um ræktun líka á netinu.

Ummæli

  1. Nafnlaus19. janúar 2024 kl. 19:12

    Þetta finnst mér alger snilld hjá þér að setja vikur neðst! Drenar miklu betur og meira jafnvægi ætti að nást varðandi rakann.Hlakka til að geta byrjað og mun fylgjast spennt með þér.Kær kveðja
    Ransý Ásgarði

    SvaraEyða
  2. Nafnlaus1. febrúar 2024 kl. 12:14

    Ég hef sett plastfilmu ofan á plastumbúðirnar sem ég sái í, teygju utan um og sting svo lítil göt með nál á plastfilmuna. Það heldur góðum raka á moldinni. Veit hinsvegar ekki hvort það væri músarhelt.

    SvaraEyða

Skrifa ummæli

Vinsælar færslur af þessu bloggi

Sá og prikla og sá. Hvar á svo að koma þessu fyrir?

dagny
Mynd
Í janúar eru fræin skoðuð, í febrúar aðeins byrjað að sá. Aukinn kraftur í mars og í apríl fer allt á fullt, allt eftir hvað á við hverja tegund. Í maí og júni er mest sáð beint út. Til að byrja með sáum við í bakka, notum mikið ísbox, tvö saman, götum vel botninn á efra boxinu. Setjum góða gróðurmold í boxið og síðan sáðmold. Vatn í neðra boxið og gefum moldinni tíma til að drekka í sig vatnið. Þegar moldin er orðin vel rök sáum við í hana eftir leiðbeiningum á pakkanum. Leggjum dagblöð eða plast yfir boxin til að halda jöfnum raka á meðan verið er að spíra. Þegar fer að þrengja að plöntunum priklum við þær þ.e. setjum hverja plöntu í sér uppeldispott. Kosturinn við að sá í bakka er að þeir taka minna pláss en ef við sáum í potta strax. Á meðan enn er frost og kuldi verðum við að rækta í íbúðarhúsinu og það er ekki stórt. Þegar hlýnar höfum við plönturnar í gróðurskálanum og notum olíufylltan ofn til að skerpa á hitanum ef þess þarf. Þá er lika freistandi að sá beint í po...
Lesa meira

Bogi, Örvar og Litli-Bogi

Mynd
Gróðurhús lengja ræktunartímann og gefa skjól og hita fyrir gróður sem síður þroskast úti. Ylplast með loftbili dregur úr útfjólubláum geislum, en húsin hitna fljótt ótæpilega, svo loftun þarf að vera ríkuleg og helst sjálfvirk þegar hitinn fer upp fyrir 20 gráður. Hér eru notaðar pumpur fylltar gasi sem þenst út í hita og opnar. Bogi t.h. og Litli-Bogi.  Fyrsta gróðurhúsið á Skyggnissteini var samsett úr tilbúnum einingum, álgrind með 3 mm smelltu plasti, svo veigalítið að það þurfti að fergja þegar hvessti og taka plastið úr á veturna. Þetta litla oddhvassa hús fékk nafnið Örvar þegar Bogi kom til sögunnar. Örvar. Bogi . Hálft reisingagengið mátar fyrsta bogann. Bogi . Langbönd leggjast á bogana og á gaflana kemur trégrind. Bogi . Langbönd skrúfuð á eyru á bogunum. Bogi . 10 mm ylplast með loftbili festist á langbönd og botnstykki. Eftir reynsluna af Örvari var Bogi  gerður úr vel traustu efni og festur kyrfilega enda hefur hann staði...
Lesa meira